Васіль «Сябро» Парфянкоў 26 чэрвеня знік без звестак

«Мне крыўдна чытаць пасты, у якіх пішуць, што беларусы здраднікі, што беларусы для іх памерлі. Але мы не памерлі, мы тут.» – беларускі добраахвотнік Васіль Парфянкоў.

Баец Палка імя Кастуся Каліноўскага Васіль «Сябро» Парфянкоў падчас бою пад Лісічанскам 26 чэрвеня знік без звестак. Сябро разам з іншымі беларускімі ваярамі, атрымалі загад правесці выведку, падчас якой яны трапілі на пераважаючы сілы рускіх войскаў. Завязаўся бой, далейшы лёс Васіля невядомы.

Васіль Парфянкоў – грамадскі актывіст, палітвязень – за ўдзел у пратэсце 19 снежня 2010 году, быў асуджаны на 4 гады строгага рэжыму. У 2015 годзе добраахвотнікам паехаў ваяваць на Данбас, бо ужо ў той час быў упэўнены, што вызваленне Беларусі магчыма толькі праз вызваленне Украіны. Прымаў удзел у баявых дзеяннях у складзе ўкраінскага батальёну АУН, быў паранены. Пасля пачатку паўнамасштабнага ўварвання ва Украіну далучыўся спачатку да сяброў з АУН з якімі ваяваў падчас АТО, а пасля утварэння Палка імя Каліноўскага, стаў у яго шэрагі.

У Васіля засталася жонка і двое дзяцей. Апошняя іх размова з жонкай Алёнай, адбылася 24 чэрвеня. Яна распавядае, што Васіль ніколі не скардзіўся на цяжкасці, стараўся яе падбадзёрыць, расказваў пра надвор’е, пра саслужыўцаў, жартаваў, планавалі паездку ў Грузію пасля вайны. Алёна падкрэслівае, што галоўнымі рысамі характэра Васіля былі: абвостранае пачуцце справядлівасці, нецярпімасці да хлусні, прынцыповасць, гонар і годнасць. Ён выразна бачыў сваю мэту і шлях да яе. «У палон ён ніколі б не здаўся. Ён жыў героем і загінуў героем» -кажа яна.

Афіцыйна Васіль Парфянкоў лічыцца зніклым без вестак, але прааналізаваўшы варожыя фота-відэа матэрыялы, кіраўніцтва Палка прыйшло да высноваў, што верагодна ён загінуў на полі бою.

Героі не паміраюць, пакуль мы іх памятаем!